Жорий йилда эртаги сабзининг бир ойга кеч пишгани нархларнинг ошиб кетишига сабаб бўлди.
2021 йилда барча тоифадаги фермер хўжаликларида жами 124,4 минг гектар майдонга (ўтган йилга нисбатан 18,2 минг гектарга кўп) сабзи экилган. 2021 йилда етиштирилган 2 миллион тоннадан ортиқ сабзи асосий қисми ички бозор эҳтиёжларини қондиришга йўналтирилмоқда.
Таъкидлаш жоизки, мамлакат аҳолисининг сабзига бўлган йиллик эҳтиёжи 700-800 минг тоннани ташкил этади. Сабзи маҳсулотларининг истеъмол саватидаги улуши 0,4% ни ташкил қилади.
Хўш, бу деҳқоннинг даромадига қандай таъсир қилди? Шу ва бошқа саволлар билан Юқори Чирчиқ тумани, «Нодир» фермер хўжалигида фаолият юритадиган деҳқон Ғазатов Мухторжонга юзландик.
Мухторжон ака 60 ёшда. У оилавий деҳқончилик билан шуғулланади. Табиийки, даладаги ишлар ҳеч қачон тўхтаб қолмайди. Деҳқон ваксина олиб, ёз бўйи далада меҳнат қилади. Бу йил улар 1 гектар ерга тарвуз эккан ва 60-70 тонна хосил олган. Гектардан 12 тонна маккажўхори олиб, иккинчи экинга сабзи эккан.
— Мана, ҳозир сабзини йиғиштиряпмиз! 60 сотих ердан Худо хоҳласа, 20-22 тоннадан 40-45 тоннагача хосил бўлади. Меҳнати оғир бўлгани туфайли ҳамма ҳам сабзи экавермайди. Ёқилғилар қиммат, техникалар қиммат. Биринчи сабзи уруғи экилади, кейин обработка қилинади. Ҳар битта ариқни 6-7 марта оброботка қилиш керак. Сўнгра ягана қилиш керак. Ўташ керак. Қўл меҳнати билан. Мана шу ишларни биз қиламиз.
Йиғим-терим вақтида Мухторжон ака ишчилардан фойдаланади. Мавсумда 20-30 нафаргача ишчи олади. Уларга 80.000 — 100.000 дан ҳақ тўлайди. Ишчи кучи учун камида 15-20 000 000 расход қилади. Ички бозорларда эса сабзининг нархи 1000 сўм, 1500 сўм. Деҳқоннинг даромади чиқимларини қоплай оладими, йўқми, бу ҳали аниқ эмас. У ҳосилнинг қолган қисмини холодильникда сақлаб, баҳорда олиб чиқиб, бозорларни тўлдириш ниятида.
Сабзи экспорти рақамлари
2021 йилда Ўзбекистон сабзиси 9 давлатга 7,6 миллион АҚШ доллари миқдорида:
-Қозоғистон Республикасига 30,5 минг тонна (4 миллион доллар),
-Қирғизистон Республикасига 16,5 минг тонна (2,8 миллион доллар),
-Россия Федерациясига 3 минг тонна (704 минг АҚШ доллари), шунингдек, Тожикистон, Беларус, Чехия, Украина, Корея Республикаси ва Бирлашган Араб Амирликларига экспорт қилинган.
Темир ИСМОИЛОВ таёрлади